Gardas de seguridade para defender os intereses de Renfe

Se Renfe estivese xestionada cun chisco de lóxica, o normal sería que fose a primeira interesada en proporcionar toda a información dispoñible sobre as tarifas e condicións dos abonos nos novos Avant entre Ourense e A Coruña, pero xa estamos curados de espanto e por desgraza non nos sorpende que retrase e oculte ata o último momento esta información. Namentres a xente planifica a súa vida en torno a rumores e información que filtran os propios empregados da empresa.

Semella que esta situación non é o suficientemente absurda, e Renfe quere tensar un pouco máis a corda a ver canto aguanta.

Un grupo de persoas fartas desta situación fixeron un escrito de recollida de sinaturas para solicitarlle a Renfe información sobre as tarifas, horarios e abonos destes novos servizos. Este grupo de persoas, que se coñecen entre si, estaban asinando o escrito cando aconteceu o que a propia afectada relata a continuación:

Un garda de seguridade dirixiuse a min, que nese momento tiña o escrito, nun tono incorrecto dicindo que estaba facendo algo ilegal e que estaba actuando en contra dunha normativa interna do tren que prohibe recoller sinaturas (normativa que agora solicitei en Renfe e dinme que non existe ou polo menos que ninguén coñece), e esixíndome publicamente ser identificada. Como el non ten competencia para identificarme eu pregunteille o motivo e que, de esixirmo, eu só me identificaría ante un axente da autoridade. Entón, sin atender en absoluto as miñas explicacións, chamou á policía. E viñeron 4 policías ao andén a Santiago, que consideraron que non había nada incorrecto na miña actuación. Pero o despliegue que se montou foi de película. Non se entende como se pode someter aos viaxeiros a tremendas vexacións e humillacións nun abuso de autoridade por parte de alguén que ten xustamente a función de poñer orde. Eu estou facendo as reclamacións que considero oportunas.

É penoso que os usuarios de Renfe, os cales sustentamos este servizo teñamos que sufrir este tipo de vexacións. Ata cando imos ter que seguir aturando este tipo de abusos?!!!!